Óskemende jaıaý júrginshini qaǵyp óltirgen kólik júrgizýshisi 2 jarym jylǵa sottaldy

<p>ÓSKEMEN. KAZINFORM &ndash; Óskemen qalasynda jaıaý júrginshini qaǵyp óltirgen kólik júrgizýshisine qatysty sot úkimi shyqty.</p>

Oqıǵa qaladaǵy Grýzınskaıa men Vınogradov kósheleriniń qıylysynda bolǵan. Solǵa burylǵan kólik júrgizýshisi baǵdarshamnyń jasyl túsine ótip bara jatqan jaıaý júrginshini baıqamaı, qaǵyp ketken. Aýyr jaralanǵan azamat sol jerde kóz jumdy.

Qalalyq №2 soty baspasóz qyzmetiniń málimetine súıensek, sot barysynda aıyptalýshy óz kinásin tolyqtaı moıyndady.

«Er adam buryn sottalmaǵan jáne kóliginde ákimshilik aıyppul bolmaǵan. Sondaı-aq jábirlenýshi tarap ony bas bostandyǵynan aıyrmaýdy surady. Sot sheshimimen sottalýshy 2 jyl 6 aıǵa bas bostandyǵynan shektelip, 5 jyl merzimge kólik aıdaý quqyǵynan aıyryldy», - delingen aqparatta.

Úkim áli zańdy kúshine engen joq.