Óskemende jańa JEO salynatyn boldy
Óskemende jańa JEO qurylysyn bastaý josparlanýda. Bul týraly ShQO Óńirlik kommýnıkatsııalar qyzmetinde ótken baspasóz brıfınginde oblystyq Energetıka jáne turǵyn úı-kommýnaldyq sharýashylyq basqarmasynyń basshysy Nurlan Ramazanov málimdedi.
«Jańa JEO qurylysynyń jobasy QR Prezıdenti Qasym-Jomart Toqaevtyń tapsyrmasy aıasynda qolǵa alyndy. Bul jobany iske asyrý jylý qýatynyń tapshylyǵyn joıýǵa jáne qalany odan ári damytý úshin qajetti rezerv qurýǵa múmkindik beredi. Búgingi kúni jylý energııasyna qajettilik 1232 Gkal/saǵatty quraıdy», - dedi ol.
Budan bólek Óskemende jylý energııasynyń tapshylyǵyn qysqartý maqsatynda ótken jyldyń jeltoqsan aıynan bastap «Óskemen jylý júıeleri» AQ-nyń №2 qazandyǵyn keńeıtý boıynsha jobalyq-smetalyq qujattamany ázirlenýde. Bul joba jylý kóziniń qýatyn 100 Gkal/saǵatqa ulǵaıtýdy kózdeıdi.
«Óskemen JEO» JShS jáne Energetıka mınıstrligi jylý qýaty 130 Gkal/saǵat bolatyn №16 qazandyq agregatyn salýǵa baǵyttalǵan ınvestıtsııalyq kelisim jasasty. Sonymen qatar óńirde jańartylǵan energııa kózderin damytý boıynsha jumystar júrgizilip jatyr. Jalpy qýaty 58,3 MVt bolatyn 4 sý elektr stantsııasyn salý josparlanýda. Atap aıtqanda, Katonqaraǵaı aýdanynda 2027 jylǵa deıin 1,4 MVt, Altaı aýdanynda 2029 jylǵa deıin 50 MVt jáne Zaısan aýdanynda 2029 jylǵa deıin 6,9 MVt», - dedi Nurlan Ramazanov.