Óskemende jańa kóterme taratý jáne gematologııalyq ortalyqtar salynady

<p>Shyǵys Qazaqstan oblysynda jumys saparymen bolǵan QR Premer-Mınıstri Álıhan Smaıylov Óskemendegi &laquo;Altaı&raquo; kóterme-taratý ortalyǵynyń jáne Gematologııa ortalyǵynyń qurylys jumystarymen tanysty, dep habarlaıdy <a href="https://kaz.inform.kz/" target="_blank" rel="noopener">QazAqparat</a>.</p>

Shyǵys Qazaqstan oblysyna ınvestıtsııa tartý jónindegi is-sharalar jospary sheńberinde kóterme-taratý ortalyǵyn iske qosý jónindegi iri ınvestıtsııalyq joba júzege asyrylyp jatyr. Bul azyq-túlik ónimderiniń baǵasyn turaqtandyrýǵa aıtarlyqtaı úles qosyp, aýyl sharýashylyǵy salasyndaǵy shaǵyn jáne orta kásipkerlikti damytýǵa serpin beredi.

Qazirgi ýaqytta munda jalpy aýdany 20 myń sharshy metrdi quraıtyn, 45 myń tonnaǵa deıin ónim qabyldaı alatyn 2 kókónis saqtaý qoımasynyń qurylysy aıaqtalýǵa jaqyn. Ekinshi kezeń aıasynda 2024 jyly KTO qurylysy aıaqtalýy tıis, onda taýar túsirý úı-jaılary, et, balyq, jemis-jıdek, kókónis, sút jáne nan ónimderin satýǵa arnalǵan alańdar ornalasady. Sonymen qatar shaǵyn naýbaıhana, dámhana jáne jármeńke ótkizýge arnalǵan alań ashý josparlanyp otyr.

Premer-Mınıstr atalǵan jobanyń óńir úshin mańyzdy ekenin atap ótti.

«Eń áýeli, bul ishki naryqty qajetti ónimdermen, onyń ishinde kókónistermen jáne basqa da azyq-túlikpen turaqty túrde qamtamasyz etýge múmkindik beredi. Baǵany turaqtandyrýǵa yqpal etedi. Eń bastysy, ónim tapshylyǵy jıi týyndaıtyn maýsymaralyq kezeńde ónim saqtaý arqyly kókónister men jemisterdi bazarlar men dúkenderge jetkizý múmkindigi bolady», - dedi Álıhan Smaıylov.

Onyń aıtýynsha, KTO kórshi elder arasyndaǵy tranzıtti qamtamasyz ete alady, bul onyń kólik-logıstıkalyq áleýetin tolyq ashady.

Munda sharýa qojalyqtarynyń biriniń basshysy Valerıı Qasymbaev Úkimet basshysyna bal óńdeý zaýytyn salý týraly usynys jasady. Daıyn ónimdi ishki naryqqa da, eksportqa da jiberýge bolady.

«Bul - óte qajet joba. Meniń oıymsha, biz qarjylandyrý máselesiniń sheshimin tabamyz», — dedi Premer-Mınıstr.

Kelesi kezekte Álıhan Smaıylov álemdik standarttarǵa sáıkes salynyp jatqan gematologııalyq ortalyqtyń qurylys barysymen tanysty. Munda hımıoterapııanyń kúndizgi statsıonary, balalar aýrýhanasy, somatıka, eresekter gematologııasy, kardıologııa jáne kardıohırýrgııa, súıek kemigin transplantatsııalaý jáne basqa da bólimsheler qarastyrylǵan. Ortalyq bazasynda azamattar dıagnostıkadan bastap ońaltýǵa deıingi qyzmet túrlerin ala alady. Ǵımarat 2024 jyldyń sońynda ashylady dep kútilýde.

Premer-Mınıstr bul ortalyqtyń oblys úshin ǵana emes, jalpy respýblıka úshin de mańyzy zor ekenin, onyń qaterli isikter, qan aınalymy júıesi aýrýlary jáne basqa da syrqattary bar naýqastarǵa keshendi medıtsınalyq kómek kórsetetinin atap ótti.