Óskemende jalǵan qujat jasaǵan esepshi memleketke 247 mln teńge zalal keltirgen
17:45, 03 Maýsym 2020
ÓSKEMEN. QazAqparat – Óskemen qalasynda kásipkerlerge salyqtan jaltarýǵa kómektesken esepshi sottaldy, dep habarlaıdy QazAqparat tilshisi.
ShQO ekonomıkalyq tergeý departamentiniń málimetine súıensek, áıel adam paıda tabý maqsatynda jalǵan býhgalterlik qujat jasaýmen aınalysqan.
Departament qyzmetkerleri oǵan qatysty tergeý amaldaryn aıaqtady.
«Anyqtalǵandaı, ol 2017-2019 jyldar aralyǵynda kommertsııalyq uıymdarǵa zańsyz shot-faktýra jazyp kelgen. Osylaısha, sol kompanııalar birneshe jyl salyqtan jaltardy. Qala turǵyny ashqan jalǵan mekemelerde jumysshylar shtaty, dúnıe-múlik pen qoımalar bolmady. Onyń bul áreketinen memleketke 247 mln teńge mólsherinde shyǵyn kelgen» delingen habarlamada.
Óskemen qalalyq № 2 sotynyń úkimimen aıyptalýshy QR Qylmystyq kodeksiniń 216-baby 3-bóligi jáne 28-baby 3-bóligi boıynsha kináli dep tanylyp, 3 jylǵa bas bostandyǵynan aıyryldy.