Óskemende zań buzǵan Ózbekstan azamatynan para alǵan polıtseı 3,5 jylǵa sottaldy

ÓSKEMEN. QazAqparat – Óskemen qalasynda zańdy buzǵan Ózbekstan azamatynan para alǵan polıtseı sottaldy, dep habarlaıdy QazAqparat tilshisi.

ShQO soty baspasóz qyzmetiniń málimetine súıensek, ýchaskelik polıtsııa ınspektorynyń kómekshisi Óskemende ýaqytsha tirkelgen mekenjaıda turmaǵan Ózbekstan azamatyn anyqtaǵan.

Zańbuzýshyny jaýapqa tartqannyń ornyna ol 100 myń teńge kóleminde para alǵan.

Osydan keıin tártip saqshysy kóshi-qon qyzmetine sheteldiktiń Qazaqstanda ýaqytsha tirkeý mekenjaıynda turmaıtyny týraly habarlamaǵan.

«Osyǵan baılanysty sot isi Óskemen qalalyq №2 sotynda qaraldy. Jasalǵan qylmystyń sıpatyn, aýyrlyǵyn jáne qoǵamǵa qaýiptiligin eskergen sot aıyptalýshyny Qazaqstan Respýblıkasy Qylmystyq Kodeksiniń 366-baby 2-bóligimen kináli dep tapty. 3 jarym jylǵa bas bostandyǵynan aıyrylǵan eks-polıtseıge memlekettik qyzmette jumys isteýge ómir boıyna tyıym salyndy», - delingen aqparatta.

Sondaı-aq sottalýshy «polıtsııa leıtenanty» sheninen aıyryldy.

Úkim áli zańdy kúshine engen joq.