Óskemende «Úzdik ulttyq kıim» baıqaýy ótedi

ÓSKEMEN. QazAqparat - Naýryz meıramyn merekeleý aıasynda Óskemen qalasynyń ákimdigi úzdik ulttyq kostıýmge konkýrs jarııalaıdy, dep habarlaıdy QazAqparat qala ákiminiń baspasóz qyzmetine silteme jasap.

«Іs-shara 22 naýryzda saǵat 11.00-de Respýblıka alańynda bastalady. Baıqaýǵa barlyq qala turǵyndary men qonaqtary qatysa alady. Ol úshin Respýblıka alańyna kelip, baıqaýdyń tirkeý pýnktine baryp, kez kelgen ulttyń dástúrli kostıýmin myna nomınatsııalar boıynsha usyný qajet: «Úzdik áıel kostıými», «Úzdik erler kostıými», «Úzdik balalar kostıými», «Otbasylyq juptyń úzdik kostıými», - dep málim etti Óskemen ákiminiń baspasóz qyzmeti.

Kostıýmder ulttyq dástúrlerge sáıkestigi, daıyndaý sheberligi men shyǵarmashylyq kózqaras turǵysynan baǵalanady. Qazirgi zamanǵy kostıýmde ulttyq elementterdi paıdalaný qajet.

Sondaı-aq, baıqaý qorytyndysy boıynsha árbir nomınatsııada ınternet-daýys berý arqyly «Kórermen kózaıymy syılyǵy» ıegerleri anyqtalady. Bul úshin alańda arnaıy foto-aımaq ornatylady. Qatysýshylar selfı jasap, ony #IloveOskemen heshtegimen Instagram áleýmettik jelisinde jarııalaýy tıis. Jeńimpazdar estelik syılyqtarǵa ıe bolady.