Óskemende úshem dúnıege keldi
01:21, 14 Naýryz 2023
ÓSKEMEN. QazAqparat – Óskemen qalasynda úshem dúnıege keldi, dep habarlaıdy QazAqparat tilshisi.
ShQO Densaýlyq saqtaý basqarmasynyń málimetine súıensek, Óskemendegi Ana men bala ortalyǵynda úshem jaryq dúnıe esigin ashty. Bul Shyǵys Qazaqstan oblysyndaǵy bıylǵy alǵashqy úshem.
Úsheýi de qyz. Shaqalaqtar shala týylǵandyqtan áýelde jansaqtaý bólimine aýystyryldy. Keıin qaıtadan perzenthanaǵa jatqyzyldy. Qyzdardyń salmaqtary - 2540, 2342 jáne 2030 gramm.
«Ata-anasy balalaryna Alena, Marýsıa jáne Marına dep at qoıdy. Jalpy óńirde úshem týatyndar óte az. Sondyqtan bul tek bir otbasy úshin emes, muqym oblys úshin aıtýly oqıǵa», - deıdi Ana men bala ortalyǵynyń qyzmetkerleri.
Aıta keteıik, jalpy Shyǵys Qazaqstan boıynsha qańtar-aqpan aılarynda barlyǵy 1499 náreste dúnıege kelgen.