Óskemende tyıym salynǵan dinı kitaptardy saqtaǵan er adam sottaldy
Qalalyq ákimshilik quqyq buzýshylyq isteri jónindegi mamandandyrylǵan sotynyń málimetine súıensek, tyıym salynǵan dinı kitaptardy saqtaǵan 31 jastaǵy er adamǵa qatysty sot úkimi shyqty.
Belgili bolǵandaı, aıyptalýshy dinı kitaptardyń sýretin áleýmettik jelige salǵan. Jelige monıtorıng júrgizgen polıtsııa qyzmetkerleri muny baıqap, oǵan qatysty is qozǵady. Sot barysynda azamat kinásin moıyndamaı, kitaptardyń óziniki emestigin aıtqan.
«Er adamnyń uıaly telefonynan dinı sıpattaǵy aýdıoqosymsha da tabyldy. Aıyptalýshy QR ÁQBtK-niń 453-babynyń 4-bóligimen (Qazaqstan Respýblıkasynyń konstıtýtsııalyq qurylysyn kúshtep ózgertýdi, onyń tutastyǵyn buzýdy, memleket qaýipsizdigine nuqsan keltirýdi, soǵysty, áleýmettik, násildik, ulttyq, dinı, tektik-toptyq jáne rýlyq arazdyqty qozdyrýdy, qatygezdikke, zorlyq-zombylyqqa bas urýdy jáne pornografııany nasıhattaýǵa nemese úgitteýge baǵyttalǵan málimetter men materıaldar qamtylǵan, buqaralyq aqparat quraldaryna jatpaıtyn ózge de ónimdi Qazaqstan Respýblıkasynyń aýmaǵynda daıyndaý, saqtaý, ákelý, tasymaldaý, taratý) kináli dep tanyldy. Tártip buzýshyǵa 241 500 teńge aıyppul salyndy», - delingen aqparatta.