Óskemende tramvaı astyna túsip qalǵan júrgizýshige ótemaqy tólendi

ÓSKEMEN. QazAqparat - «Óskemen -Tártip» KMK mashınasy muzǵa taıyp, tramvaı men jol baǵanasynyń ortasynda qalyp qoıǵan júrgizýshige barlyq zalaldyń aqysyn tóledi.

Jaqynda ǵana kásiporyn men júrgizýshi Sergeı Kostenko medıatıvti kelisimge qol qoıyp, oǵan tıisti qarjy tólengen, dep habarlaıdy «QazAqparat» HAA tilshisi.

Buryn habarlaǵandaı, 24 qarasha kúni Óskemende Táýelsizdik dańǵylynda jol-kólik apaty oryn aldy. Joldaǵy qalyń muzdyń saldarynan Sergeı Kostenkonyń sheteldik markaly avtomobıli júrip kele jatqan tramvaı men jol baǵanasynyń arasynda qalyp qoıǵan. Mashına ortasynan qaq bóline jazdaǵan. Júrgizýshi zardap shekpedi. Bul iri jol apaty jeli qoldanýshylary men qala saıtynda úlken dúrbeleń týǵyzyp, qyzý talqyǵa salyndy. Qala turǵyndary Memleket basshysyna petıtsııa jazyp, óńirdegi joldyń nasharlyǵyna baılanysty kinálilerdi jazalaýyn suraǵan.

Búgin «QazAqparat» HAA tilshisi osydan bir aı buryn taǵaıyndalǵan «Óskemen-Tártip» KMK basshysy Tamara Rahymjanovamen  qalalyq ákimdikte ótken joldy tazalaýǵa arnalǵan kezekti jınalystyń sońynda tildesken edi. Áńgime barysynda, kásiporynda kemshilikterdiń kóptigi, solardyń biri - tehnıka jetispeýshiligi ekendigi aıtyldy «Greıdershiler tapshy, saıabaq tehnıkalary óte eski», - dep atap ótti Tamara Rahymjanova

Qazir kásiporynda qarjylyq baqylaý jáne múlikti túgendeý jumystary júrgizilýde. Alaıda jańa basshy táýelsiz aýdıt shaqyryp, barlyq máselelerdi anyqtap, sodan soń tehnıkalyq aktige qol qoımaqshy.