Óskemende toǵannyń lastanýyna baılanysty ekologtar tekserý júrgizýde

<p>Óskemen qalasynyń Prohladnyı shaǵyn aýdanyndaǵy toǵannyń lastanýyna baılanysty ekologtar tekserý júrgizýde, dep habarlaıdy QazAqparat tilshisi.</p>

ShQO Ekologııa departamenti baspasóz qyzmetiniń málimetine súıensek, Prohladnyı shaǵyn aýdanynyń Bajov kóshesindegi № 345/3 úı men saıajaılar arasyndaǵy toǵannyń lastanǵany jaıly shaǵym tústi. Olar sýǵa munaı tógilýi múmkindigin jetkizgen. Birden oqıǵa ornyna ekologtar kelip jetti.

«Hımııalyq taldaý úshin sýdan synama alyndy. Kózben sholý kezinde sý syrtqy faktorlardyń áserinen lastanýy múmkin degen boljam jasaldy. Sebebi toǵanda óli balyqtar tabylmady, al munaı ónimderine júrgizilgen zertteý nátıjeleri onyń shekti ruqsat etilgen kontsentratsııadan aspaıtyn mólsherde bolǵanyn kórsetti», - delingen aqparatta.

Toǵannyń naqty neden lastanǵany sýdyń hımııalyq zertteýleriniń tolyq nátıjelerinen keıin anyqtalmaq.