Óskemende teris dinı aǵymnyń kitaptaryn taratqan er adam ustaldy
ShQO Polıtsııa departamenti baspasóz qyzmetiniń málimetine súıensek, ekstremızmge qarsy is-qımyl basqarmasynyń qyzmetkerleri Óskemende tyıym salynǵan dinı kitaptardy taratýmen aınalysqan 32 jastaǵy turǵyndy qolǵa túsirdi.
«Onyń úıin tintý barysynda «Salafııa» atty destrýktıvti dinı baǵyttaǵy 17 kitap pen 8 dısk tabylǵan. Tárkilengen zattar oblystyq Din isteri basqarmasynyń mamandaryna saraptama júrgizýge jiberildi», - delingen habarlamada.
Óskemen qalasynyń ákimshilik soty er adamdy QR ÁQBtK-niń 453-baby 4-bóligi (Qazaqstan Respýblıkasynyń konstıtýtsııalyq qurylysyn kúshtep ózgertýdi, onyń tutastyǵyn buzýdy, memleket qaýipsizdigine nuqsan keltirýdi, soǵysty, áleýmettik, násildik, ulttyq, dinı, tektik-toptyq jáne rýlyq arazdyqty qozdyrýdy, qatygezdikke, zorlyq-zombylyqqa bas urýdy jáne pornografııany nasıhattaýǵa nemese úgitteýge baǵyttalǵan málimetter men materıaldar qamtylǵan, buqaralyq aqparat quraldaryna jatpaıtyn ózge de ónimdi QR aýmaǵynda daıyndaý, saqtaý, ákelý, tasymaldaý, taratý) boıynsha jaýapqa tartty. Osy baptyń sanktsııasyna sáıkes oǵan 100 AEK mólsherinde aıyppul salyndy.
Esterińizge sala ketsek, osyǵan deıin ShQO-da bala tasymaldaý erejesin buzǵan 717 júrgizýshi jaýapqa tartylǵanyn habarlaǵan edik.