Óskemende «Táýelsizdik» monýmentiniń qurylysy bastaldy
«Táýelsizdik» monýmenti Qazybek bı jáne Esenberlın dańǵyldarynyń qıylysynda boı kótermek. Monýment qazaq memleketiniń qalyptasý tarıhynyń belgisi retinde bederlenedi.
Kompozıtsııa bıiktigi 12,6 metr jáne dıametri 11,3 metr bolatyn altyburyshty tik monýmentten turady. Tómengi bóliginde Qazaqstannyń damý tarıhy bar relef bolady. Ortalyq bóliginde qazaq halqynyń birligi men táýelsizdigin bildiretin Tóle bı, Qazybek bı, Áıteke bı músinderi ornalasady.
«Monýmenttiń eki jaǵynda Qazaq handyǵy qabyldaǵan Jeti jarǵy zańdarynyń úzindileri jazylady. Monýmentte Qazaq handyǵynyń negizin qalaýshylar – Kereı men Jánibek hannyń músinderi de ornalaspaq», - dedi oblys ákimi Danıal Ahmetov.
Barlyq músinder qoladan, al monýmenttiń qabyrǵalary aq mármárden jasalady.
Sáýletshi jáne joba avtory – sýretshi Sársen Seıitov. Jobany jeltoqsan aıynda táýelsizdik merekesiniń qarsańynda aıaqtaý josparlanyp otyr.