Óskemende «Syndarly 30 jyl – 30 asý» atty kitap kórmesi ashyldy
Táýelsizdiktiń 30 jyldyǵyna arnalǵan kórme jyl boıy jalǵasady. Sórege qoıylǵan basylymdar otyz jyl ishindegi Qazaqstannyń jańa tarıhynan oryn alǵan mańyzdy oqıǵalardan syr shertedi.
«Búginde kitaphanaǵa keletin jastar az. Sondyqtan osyndaı kitap kórmesiniń ashylǵany quptarlyq jaǵdaı. Jastarymyz Táýelsizdigimizdi qasterleı bilýi kerek. Bostandyqtyń jolynda qurban bolǵan ultjandy aqyn-jazýshylarymyzdyń shyǵarmalary jetkilikti dárejede nasıhattalýda. Máńgilik el bolý ıdeıasyn negizge ala otyryp, urpaǵymyzdy kitap oqýǵa baýlý jaǵyn da eskergenimiz jón. Sebebi el tarıhynyń shyndyǵy osy basylymdarda», - dedi ShQO Jas Otan jastar qanatynyń tóraǵasy Almas Aıtmuqash.
Kórmede básekege qabiletti 50 eldiń qataryna ený, ashyq ǵaryshqa shyǵý, ǵylym, mádenıet, sporttaǵy jetistikter, memleket pen qoǵamnyń turaqtylyǵyn qamtamasyz etken ekonomıkalyq modernızatsııa men áleýmettik saıasattyń serpilisti bastamalarynyń nátıjesin aıshyqtaıtyn faktografııalyq, statıstıkalyq materıaldar usynylǵan. Sondaı-aq «Mádenı mura» memlekettik baǵdarlamasynyń, sonyń ishinde Shyǵys Qazaqstandaǵy arheologııalyq qazbalardyń nátıjeleri boıynsha ǵylymı jumystardy ashatyn kitaptar da qoıylǵan.
«Kitap kórmesinde usynylǵan basylymdar Táýelsiz Qazaqstannyń mańyzdy oqıǵalary men jetistikterin tolyq kórsetedi. Osy kitaptar arqyly Táýelsiz jas memlekettiń alǵashqy nyq qadamdaryn, qoǵamdyq kelisim, saıası turaqtylyq jáne beıbit syrtqy saıasatynyń arqasynda álemdik arenadaǵy bedeldi bastamashyl elge aınalǵanyn bilýge bolady», - deıdi kitaphana qyzmetkeri Araılym Qaıratqyzy.