Óskemende soǵysqa qatysqan qalamgerler týyndylarynyń kórmesi ashyldy

ÓSKEMEN. QazAqparat – Óskemen qalasynda Ekinshi dúnıejúzilik soǵysqa qatysqan shyǵysqazaqstandyq qalamgerler týyndylarynyń kórmesi ashyldy, dep habarlaıdy QazAqparat tilshisi.

A.S.Pýshkın atyndaǵy Shyǵys Qazaqstan oblystyq kitaphanasynda «1941-1945 jyldary soǵysqa qatysqan shyǵysqazaqstandyq jazýshylar» atty eske alý keshi ótti.

Altaı ólkesinde sóz ónerin ǵumyrlyq kásibine aınaldyrǵan jýrnalıster, jazýshylar men aqyndar shoǵyry az emes.

Solardyń qatarynda surapyl soǵysta oq pen ottyń arasynan aman oralyp, halqy úshin eren eńbek etken maıdanger qalamgerlerdiń orny bólek.

«Jaýynger jazýshylarymyz qoldaryna qarý alyp qana qoımaı, qalam kúshine de súıengen. Ádebı kesh sarbaz shınelin sypyryp tastap, kórkemsózdiń sheberine aınalǵan Q.Qaısenov, Á.Nurshaıyqov, Á.Sháripov, M.Mýsın, A.Egorov, M.Chıstıakov, E.Áýkebaev, S.Mashaqov, K.Orazalın sııaqty sýretkerliktiń aıryqsha úlgisin kórsetken aǵalardyń rýhyna arnaldy. Eske alý keshinde jerles maıdanger qalamgerler týraly maǵlumattar berilip, olardyń shyǵarmashylyǵynan úzindiler oqyldy», - delingen kitaphana qyzmetkerleri taratqan aqparatta.

Sondaı-aq kitaphanada «Erlik dańqy - máńgilik!» atty ádebı kórme-ekspozıtsııasy ashyldy.

Kórmege shyǵysqazaqstandyq qalamgerler týyndylary men sol kezeń týraly baıandaıtyn kitaptar, merzimdi basylymdar qoıylǵan.