Óskemende Slovakııa Respýblıkasynyń konsýldyǵy ashyldy
ShQO aqparat ortalyǵynyń málimetinshe, Qazaqstan men Slovakııa 25 jyldan astam ýaqyttan beri dıplomatııalyq qatynasta.
Osy jyldar ishinde elder arasynda saıasat, ekonomıka, mádenıet jáne basqa da gýmanıtarlyq salalarda tyǵyz baılanys ornady.
Konsýldyqtyń ashylýy - yntymaqtastyq pen seriktestikti jan-jaqty nyǵaıtýǵa baǵyttalǵan qadamdardyń biri.
Saltanatty sharaǵa Slovakııa Respýblıkasynyń Tótenshe jáne Ókiletti Elshisi Mılan Kollar qatysty.
Ol óz sózinde ótken aptada Qazaqstan Prezıdenti Qasym-Jomart Toqaev Slovakııanyń Syrtqy ister mınıstri Ivan Korchokty qabyldaǵanyn atap ótti.
«Óskemen Qazaqstannyń shyǵysyndaǵy iri qala ǵana emes, óńirdiń ónerkásiptik, ekonomıkalyq jáne mádenı ortalyǵy. Onyń týrıstik áleýeti de bar. Sondaı-aq bizdiń qysqy sport túrlerine, ásirese hokkeıge degen qyzyǵýshylyǵymyz erekshe. Konsýldyq yntymaqtastyǵymyz úshin úlken múmkindikter usynady. Birlese otyryp bıznes-qoǵamdastyqpen baılanystardy jolǵa qoıa alamyz. Keıin seriktesterimizben kezdesý uıymdastyryp, zaýyttar men kásiporyndardy aralap, tájirıbe almasýǵa bolady. Slovakııanyń mashına jasaý, agroónerkásiptik keshen, jasyl tehnologııalar, tsıfrlandyrý salalarynda mol tájirıbesi bar», - dedi Mılan Kollar.
Slovakııa Respýblıkasymen yntymaqtastyqta Qazaqstan birinshi kezekte ınvestıtsııalar men jańa tehnologııalardy tartýǵa múddeli.
Kezdesýde ShQO ákiminiń orynbasary Azamat Muhamedchınov odan ári syndarly seriktestik pen iskerlik jáne dostyq baılanystardyń nyǵaıa beretinine senim bildirdi.
«Konsýldyq Slovakııa respýblıkasynyń atynan Shyǵys Qazaqstan, Soltústik Qazaqstan jáne Pavlodar oblystarynda ókildik etetin bolady. Bul elderimizdiń ekijaqty qarym-qatynastarynyń joǵary deńgeıin kórsetedi. Dıalog barlyq salalarda erekshelenedi. Ókildik ınvestıtsııalar tartý, ekonomıkalyq, áleýmettik, mádenı, týrıstik salalardaǵy ózara is-qımyl máselelerin jańa deńgeıge shyǵarýǵa múmkindik beretinine senimdimin», - dedi ol.