Óskemende shaýrma satatyn dúńgirshekten órt shyqty

ÓSKEMEN. QazAqparat – Óskemen qalasynda qutqarýshylar órtengen shaýrma satatyn dúńgirshekten 2 gaz ballonyn alyp shyqty, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, Óskemendegi M. Gorkıı kóshesiniń boıynda ornalasqan shaýrma satatyn dúńgirshekte órt shyqqan.

Kúnbaǵys maıy janyp, ot jeke zattarǵa, turmystyq tehnıkaǵa jáne dúńgirshektiń ishki qaptamasyna tarady.

«Oqıǵa ornyna qutqarýshylar shuǵyl kelip jetti. Olar dúńgirshek ishinen 27 lıtrlik 2 gaz ballonyn syrtqa alyp shyqty. Kóp uzamaı tilsiz jaý tolyqtaı aýyzdyqtaldy. Zardap shekken eshkim joq», - delingen aqparatta.

Belgili bolǵandaı, órttiń shyǵý sebebi - peshte tamaq daıyndaý kezinde órt qaýipsizdigi talaptaryn saqtamaý.

Dúńgirshek ıesine qatysty QR ÁQBK-niń 410-baby boıynsha ákimshilik hattama toltyryldy.

Osy rette oblystyq TJD kásipkerlerden órt qaýipsizdigi erejelerin qatań saqtaýdy suraıdy.

Ǵımarat ishinde alǵashqy órt sóndirý quraldary, jumysqa jaramdy avtomatty órt dabyly bolýy kerek.

Eńbek ujymyna turaqty túrde nusqaýlyq ótkizilip otyrylýy qajet.