Óskemende satıra, sharj, karıkatýra janryndaǵy alǵashqy kórme ashyldy

ÓSKEMEN. QazAqparat - 1 sáýir- kúlki kúni Pýshkın atyndaǵy oblystyq kitaphanada jergilikti qylqalam sheberleriniń «Jańǵyrý» shyǵarmashylyq birlestigimen birlese uıymdastyrǵan «Ezý tartar» atty sýret kórmesiniń ashylý saltanaty ótti, dep habarlaıdy ShQO aqparattyq ortalyǵyna silteme jasap.

«Jańǵyrý» shyǵarmashylyq birlestigi 2019 jyly belgili sýretshi jerlesimiz Qudash Dáýletqanuly Nursadyqovtyń bastamasymen jas talanttardy qoldaý jáne aımaǵymyzdaǵy beıneleý ónerin damytý maqsatynda qurylǵan bolatyn. Qazirgi tańda shyǵarmashylyq birlestik 25 sýretshiniń basyn qosyp otyr.

«Ezý tartar» – qalamyzda buryn-sońdy bolmaǵan erekshe kórme. Jerles sýretshilerdiń satıra, sharj, karıkatýra janryndaǵy eńbekteriniń alǵashqy kórmesi 13 qylqalam sheberiniń shyǵarmalaryn halyq nazaryna usynady. Kórme túrli taqyryptardy qamtıdy. Sonyń ishinde ezýge kúlki úıiretin áriptesterge arnalǵan sharj ben qazirgi tańdaǵy ózekti taqyryptardy baıandaıtyn kartınalar erekshe nazar aýdartady.

Ashylý saltanatynda QR Mádenıet qaıratkeri, QR Sýretshiler, Jýrnalıster men Jazýshylar odaǵynyń múshesi Erkin Nurazhan quttyqtaý sóz sóıledi. Kórmeniń mańyzdylyǵy týraly Sýretshiler odaǵynyń músheleri Gúlnar Bekberdınova men Erjan Turǵanbaev aıtyp berdi.

Іs-sharaǵa qatysýshylar Erjan Turǵanbaev, Mereı Qaınaruly, Gúlnar Bekberdınova, Marjan Baqytbekova, Aıbek Samarhanov jáne basqa da qylqalam sheberleriniń satıralyq kartınalaryn kórdi. Іs-shara sońynda sýretshilerge alǵys hattar tabys etildi. Kórermenge úlken emotsııalyq áser syılaıtyn, birde qýantyp, birde oıǵa shomdyratyn tamasha týyndylar kórmesi 5 sáýirge deıin jumys isteıdi.