Óskemende psıhodıspanserde esepte turǵan adam dúkende balany býyndyrǵan
Qaladaǵy «Chaıka» degen dúkenge kelgen er adam balaǵa naqaqtan-naqaq shabýyl jasady. Bul sát ǵımarattaǵy vıdeokameraǵa túsip qalǵan.
«Ol balamdy áýeli boqtap, sosyn moınynan qylqyndyra jóneldi. Eger dúkendegi basqa adamdar bolmasa sońy ne bolaryn elestetýdiń ózi qorqynyshty. Áleýmettik jelilerde keıbireýler «bálkim bala ony mazaqtaǵan shyǵar» dep jazyp jatyr. Biraq beınejazbada kórinip turǵandaı álgi erkek ózi kelip shabýyl jasaǵan. Onyń ústine meniń ulym óte momyn, áljýaz. Qatarlastarynan boıy kishkentaı bolǵandyqtan eshkimmen eregesip, tóbelespeıdi», - deıdi anasy Anastasııa.
Onyń aıtýynsha, ýchaskelik polıtsııa ınspektory jedel áreket etip, kamera jazbasynan kúdiktini taýyp alǵan. Belgili bolǵandaı, er adam psıhodıspanserde esepte tur. Sondyqtan tártip saqshylary ony psıho-nevrologııalyq dıspanserge jetkizgen.
«Alaıda kelesi kúni úıge balam qorqyp júgirip keldi. «Mama keshegi kisi bizdiń aýlada júr» dedi. Shyǵyp qarasam, ras eken. Múmkin ol balamdy ańdyp, ósh alaıyn dep júrgen shyǵar. Birden ýchaskelik polıtseıge habarlastym. Ol qatty tańdanyp, qaıtadan patrýldik saqshylardy shaqyrdy. Sóıtip, ony taǵy da dıspanserge jatqyzǵan. Sol jaqtaǵylar psıhıkalyq aýytqýy bar adamdy qalaısha bosatyp jibergenine tańym bar. Prokýratýraǵa baryp aryz jazdym. Ondaǵylar maǵan «24 saǵat ishinde tekserýdi aıaqtap, zańsyzdyqtar anyqtalǵan jaǵdaıda tıisti shara qabyldaımyz» dep jaýap berdi», - deıdi áıel.
Onyń sózinshe, qazirgi ýaqytta kúdikti dıspanserde. Al balasynyń moıny áli de aýyrady.
«Ulym moınyn bura almaıdy. Odan bólek, psıhıkalyq turǵyda soqqy aldy ǵoı. Shynymdy aıtsam, osydan keıin balamdy dalaǵa shyǵarýdan qorqatyn boldym. Eshkimniń basyna bermesin», - deıdi anasy.
Atalǵan fakti boıynsha resmı aqparat alý úshin ShQO Polıtsııa departamentine habarlasyp kórdik. Vedomstvo ókilderi tergeý júrip jatqanyn habarlady.
«Dúkende bolǵan bul jaǵdaıǵa qatysty tergeý amaldary júrgizilip jatyr. Er adam psıho-nevrologııalyq dıspanserge jetkizildi. Tıisti saraptamalar taǵaıyndalyp, sonyń qorytyndysy boıynsha protsessýaldyq sheshim shyǵarylady. Ózge aqparattardy jarııa etýge tyıym salynǵan», - deıdi baspasóz qyzmetinen.
Ashyq kózderden alynǵan foto