Óskemende páter alýǵa kómektesemiz dep halyqty aldaǵan alaıaqtar 142 mln teńge paıda kórgen

<p>ÓSKEMEN. KAZINFORM &ndash;&nbsp; Óskemen qalasynda memlekettik baǵdarlamamen páter satyp alýǵa kómektesemiz dep halyqty aldaǵan alaıaqtar 142 mln teńge paıda tapqan.</p>

Qalalyq PB Ertis polıtsııa bólimine habarlasqan azamat alaıaqqa aldanyp qalǵanyn jetkizgen. Onyń aıtýynsha, 2022 jyldyń qarasha aıynda belgisiz bireýler páter alýǵa kómektesýge ýáde berip, 5 mln teńge alǵan. Biraq sózderinde turmaı, habar-oshasyz ketken. Jedel-izdestirý sharalaryn júrgizý barysynda polıtsııa qyzmetkerleri kúdiktilerdi qolǵa túsirdi. Olardyń taǵy 32 uqsas qylmysqa qatysy bar ekendigi anyqtaldy.

«39 jastaǵy er adam men 41 jastaǵy áıel 2021 jyldan bastap turǵyndardyń senimine kirip, memlekettik baǵdarlama boıynsha páter satyp alýǵa kómektesemiz dep ýáde berip, aqshany alǵannan keıin joǵalyp ketip otyrǵan. Osynyń saldarynan jábirlenýshilerge 142 mln teńge materıaldyq zalal keltirildi», - delingen oblystyq Polıtsııa departamenti taratqan aqparatta.

Qazirgi ýaqytta ekeýi de qamaýǵa alyndy. Alaıaqtyq faktileri boıynsha tergeý júrgizilip jatyr.

Óskemende úılerge jylý berilip jatqanyn jazǵan bolatynbyz.