Óskemende ótken «Jastar Time» IT-festıvalinde 5 myńnan astam adam bas qosty

ÓSKEMEN. QazAqparat - Oblys ortalyǵynda aımaqtaǵy aqparattyq-kommýnıkatsııalyq tehnologııalardy meńgerýge den qoıǵan jastar arasyndaǵy VII oblystyq IT-festıvali ótti, dep habarlaıdy QazAqparat ShQO aqparat ortalyǵyna silteme jasap.

Munda óńirdegi mektep oqýshylarymen qatar, kolledj, JOO stýdentteri kelip, ózderiniń ǵylymı jobalaryn tanystyrdy.

Uıymdastyrýshylardyń aıtýynsha, osy jyly IT-festıvaldiń aýqymy keńeıgen. Kórermender vırtýaldy shyndyq kózildirigin kııý arqyly ınnovatsııalyq 3D-kitaptardy paraqtap, robot-gıdpen sóılesýge múmkindik aldy. Al 200-ge tarta qatysýshy 95 zamanaýı IT jobalaryn «Meıkerlik», «Junior Skills», «Startup-jobalar», «ClusterPro» jáne robopolıgon sektorlarynda kórermen nazaryna usyndy. Jas ónertapqyshtardyń jobalary tańǵalarlyq qana emes, turmysta paıdaly ári ózekti bolyp shyqty.

Mysaly Úrjar aýdanynan kelgen Ersin Tileýǵabyl kórý qabileti tómen jandarǵa arnalǵan arnaıy qurylǵy oılap tapqan. Ereksheligi - adam qolyna kııý arqyly aldynda turǵan qandaı nysan ekenin anyqtaıdy. Odan bólek, onyń baǵasy da qoljetimdi. Jas ónertapqyshtyń aıtýynsha, mundaı ıdeıany ózi oılap taýyp, keıin jetekshisi ekeýi qolǵa alǵan.

Sondaı-aq, Semeıdegi erlerge arnalǵan «Jas ulan» lıtseıiniń kadetteri Dildar Nursultan men Ańsar Qusaınov ekzoqańqanyń óz modelin oılap tapqan. Onyń biregeı tehnologııasy qutqarýshylarǵa apatty jaǵdaılarda ondaǵan adamdy almastyrýǵa múmkindik beredi.

Kórmege qoıylǵan jas ónertapqyshtardyń zamanaýı jobalaryna ShQO ákimi Danıal Ahmetov joǵary baǵa berdi. 100-ge tarta jobanyń ishinde aımaq basshysy atap ótken eki joba - robot-manıpýlıator men ınternetsiz jumys isteı alatyn qazaq-latyn qarpin túrlendirgish qosalqy baǵdarlama boldy. Olardyń avtorlary oblystyq fızıka, matematıka jáne ınformatıka boıynsha daryndy balalarǵa arnalǵan arnaıy mektep-lıtseıiniń oqýshylary Nıkıta Pıatkov, Vıacheslav Tregýb, Iskander Chadoev jáne Zaısannan kelgen Dana Árimjanova.

«Osyndaı jobalardy jasaı otyryp, sender jańa bilimge jol ashyp qana qoımaısyńdar. Sender osylaısha ózderińniń de, bizdiń de bolashaǵymyzǵa jol ashasyńdar. Durys baǵyttasyńdar. Bul festıval kreatıvti jastarǵa mol múmkindikter beredi degen oıdamyn»,-dedi óz sózinde aımaq basshysy Danıal Ahmetov.

Shara qorytyndysy boıynsha táýelsiz sarapshylar «Úzdik ІT-joba» jáne «Kórermen kózaıymy» júldesin onlaın-daýys berý arqyly anyqtady. Jarma aýdany Karelın P.G. atyndaǵy orta mekteptiń oqýshysy Ańsar Meıramhanov kórermen kózaıymy atandy. Al bas júldeni smart-besik jasaǵan Álı Berdibek (Shákárim atyndaǵy №1orta mektep, Óskemen), 1-oryndy 21 ǵasyr mektep portfelin ala kelgen Nadejda Zakýsılova (№4 orta mektep, Óskemen), 2-oryndy «Teńge alý» kompıýterlik oıynyn oılap tapqan Álisher Máýletov pen Іlııas Zakarııanov (Úsh tilde bilim beretin Shákárim atyndaǵy kópsalaly gımnazııa, Semeı), al 3-oryndy logopedtik trenajer jobasymen Qymbat Jeńishan (S.Amanjolov atyndaǵy ShQMÝ, Óskemen) ıelendi.

Aıta ketý kerek, bıyl kúzde oblys ortalyǵynda halyqaralyq ІT forým ótedi. Byltyrǵydaı oqýshylar men stýdentter jáne ІT kompanııalardyń óz jobalaryn usynýyna jaǵdaı jasalady. Al úzdik jobalarǵa aımaqtyń áleýmettik-ekonomıkalyq salasyn damytýǵa úles qosý úshin grant bólinbek.