Óskemende órtengen úıden áıeldi qutqarǵan 3 jigit marapattaldy
ShQO TJD baspasóz qyzmetiniń málimetine súıensek, QR Tótenshe jaǵdaılar mınıstriniń buıryǵymen Óskemende órt kezinde áıeldi qutqarǵan úsh jigit marapattaldy.
Oqıǵa 12 naýryzda Protozanov kóshesinde bolǵan. Sol mańaıdan ótip bara jatqan er adamdar 9 qabattaǵy páterde shyqqan órti baıqap qalady. Taıap barǵanda balkonnyń karnızinde ilinip turǵan áıeldi kórgen. Berik Saǵymbaev, Daryn Jánibekov, Bektemir Álibekov oılanbastan kómekke umtyldy.
Podezge júgirip kirip, órt shyqqan jerden bir qabat tómen ornalasqan kórshi páterdiń esigin qaǵady. Dereý balkonǵa barǵan Berik Saǵymbaev áıeldi ustap úlgergen. Oǵan dostary Daryn jáne Bektemir kómektesti. Sodan keıin podezdegi páterlerdi túgel aralaǵan olar turǵyndarǵa órt týraly habarlap, úıden shyǵý qajettigin jetkizgen.
«Beıbit kúnniń batyrlary adam janyn ajaldan arashalap, azamattardy evakýatsııalady. Osyndaı syn saǵatta erlik tanytqan jigitterge Alǵys hat berildi», - delingen aqparatta.