Óskemende óńirdiń kıeli jerleri týraly semınar ótti

ÓSKEMEN. QazAqparat – Óskemen qalasynda búgin «Rýhanı jańǵyrý» baǵdarlamasy aıasynda «Shyǵys Qazaqstannyń kıeli jerleri» atty semınar ótti, dep habarlaıdy QazAqparat.

Qazaqstan-Amerıkandyq erkin ýnıversıtetinde uıymdastyrylǵan sharanyń negizgi maqsaty – ólkeniń qasıetti jerlerin nasıhattaý, dúıim jurtqa keńirek tanystyrý. Semınarǵa oblys mektepteriniń tarıh, geografııa pánderiniń muǵalimderi qatysty.

«Ár eldiń tarıhı mańyzy bar kıeli jerleri bolady. Bul sol ultqa tán rýhanı dástúr negizderiniń biri. Keń baıtaq Qazaqstanda qasıetti jerler jeterlik. Alaıda osyǵan deıin sol mekenderdiń birtutas tizbegi jasalmaǵan. Sondyqtan Shyǵys Qazaqstannyń kıeli jerleri jaıly syr shertetin elektrondy kitap shyǵarýdy kózdep otyrmyz», - deıdi QAEÝ «Bıznes» kafedrasynyń aǵa oqytýshysy Dınara Mamyrbekova.

Shara barysynda birqatar taqyrypta baıandama jasalyp, jıylǵandarǵa Aqbaýyr, Shilikti, Jıbedaı syndy kıeli jerlerdiń tarıhy tanystyryldy.