Óskemende Naýryz meıramyna oraı qolóner buıymdarynyń kórmesi ótti
Óskemendegi A.S. Pýshkın atyndaǵy Shyǵys Qazaqstan oblystyq kitaphanada Ulystyń uly kúni qarsańynda birqatar shara uıymdastyryldy.
«Kelýshiler «Qosh keldiń, áz-Naýryz!» ádebı-mýzykalyq qonaqjaıynda merekelik dastarhannan dám tatyp, ónerpazdardyń qazaqtyń ulttyq salt-dástúrine arnalǵan qoıylymdaryn kórdi. Beıqam balalyq shaqtaryn eske alyp, ulttyq oıyndar oınady. Sondaı-aq qolóner buıymdarynyń kórmesin tamashalap, sheberlermen birge buıymdar jasady. «Ulttyq stıl – jaqutymyz» ulttyq kostıýmderdiń art-defılesinde sońǵy úlgimen jasalǵan qazaqtyń ulttyq kıimderi merekege erekshe sán berdi. Qonaqtar kıimniń tarıhy, erekshelikteri týraly da maǵlumat aldy», - delingen kitaphana qyzmetkerleri taratqan aqparatta.
«Qazaqstan halyqtarynyń ulttyq taǵamdary» taǵamdar jármeńkesi ótkizildi. Onda qonaqtarǵa ár túrli ulttyq taǵam túrleri usynyldy.
«Budan bólek, turǵyndar «Danalyq kıiz úıinde» «Naýryz toıy – mereke, salt-dástúrim – bereke» ınteraktıvti ádebıetter ekspozıtsııasymen tanysty. «Salt-dástúrim – saltanatym» atty ulttyq salt-dástúrimizge arnalǵan vıktorına men «Naýryz merekesiniń tarıhyn bilemiz be?» kvest oıynyna qatysyp, syılyqtarǵa ıe boldy», - delingen málimette.