Óskemende Naýryz meıramyna oraı kınoteatrlarda otandyq fılmder tegin kórsetildi

ÓSKEMEN. QazAqparat – Óskemen turǵyndary Ulystyń uly kúnin keń kólemde atap ótti, dep habarlaıdy QazAqparat tilshisi.

Óskemende Ulystyń uly kúninde túrli chellendjder, sporttyq jarystar ótti. Ortalyq alańǵa jınalǵan jurtshylyqqa ulttyq taǵamdar usynylyp, kınoteatrlarda otandyq fılmder tegin kórsetildi. Shahar jurtshylyǵy men jastary merekege oraı «Eko Naýryz» aktsııasyn ótkizip, Sheshek asýy mańyndaǵy bulaqty qoqystan tazartty.

Mereke kúni bas alańda kıiz úı qalashyǵy, balalar oıyn alańdary men halyq sheberleriniń sándik-qoldanbaly óner kórmesi uıymdastyryldy. Al jármeńkede Óskemen turǵyndary ár túrli dámdi taǵamdardan dám tatyp, saýda kórkin qyzdyrdy.

«Baursak party» baıqaýyna qatysýshylardyń qolynan qala turǵyndary ystyq baýyrsaqtan dám tatty. Meıram úlken kontserttik baǵdarlamaǵa ulasty. Oǵan shahardyń etnomádenı jáne shyǵarmashylyq ujymdary qatysty. Sport áýesqoılary asyq atý, gir sporty, qazaqsha kúres jáne basqa da ulttyq sport túrleri boıynsha jarysqa tústi.

ShQO ákimi Danıal Ahmetov turǵyndardy Naýryz merekesimen quttyqtap, ár otbasyna baqyt, amandyq pen bereke tiledi.