Óskemende meıramhana órtendi

<p>Óskemen qalasyndaǵy meıramhanalardyń birinde órt shyqty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

ShQO Tótenshe jaǵdaılar departamenti baspasóz qyzmetiniń málimetine súıensek, Óskemende órt sóndirýshiler meıramhanadaǵy qyzyl jalyndy jyldam aýyzdyqtady.

«Grýzınskaıa kóshesindegi meıramhana shatyrynyń aǵash qurylymdary otqa oranǵan. Oqıǵa ornyna qutqarýshylar shuǵyl kelip jetti. Oǵan deıin meıramhanaǵa kelýshiler men sonda jumys isteıtin qyzmetkerler óz betterimen syrtqa shyǵyp ketken», - delingen aqparatta.

Tilsiz jaýmen kúreske barlyǵy jeke quramnan 35 adam men 10 tehnıka jumyldyryldy. Órt sóndirýshilerdiń úılesken is-áreketteriniń arqasynda jalynnyń ary qaraı taralýyna jol berilmedi.

Abyroı bolǵanda, zardap shekken eshkim joq. Qazirgi ýaqytta órttiń shyǵý sebebi anyqtalýda.

Eske salsaq, osyǵan deıin Rıdder turǵynynyń aýlasynda turǵan 3 jarym tonna pishen órtengeni habarlanǵan.