Óskemende mektepti jóndeýge dep ata-analardan aqsha jınaǵan muǵalim sógis aldy

ÓSKEMEN. QazAqparat – Óskemen qalasynda ata-analardan aqsha jınaǵan mektep muǵalimi jaýapqa tartyldy, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttigi ShQO boıynsha departamentiniń málimetine súıensek, 1424 Call-ortalyǵyna Óskemendegi №15 orta mektep oqýshysynyń anasy habarlasqan.

Óz sózinde ol muǵalimniń mektep kabınetin jóndeýge aqsha jınap jatqanyn aıtyp, shaǵym túsirdi.

«Tekserý barysynda atalǵan fakti rastaldy. Jınalǵan qarajat ata-analarǵa tolyqtaı qaıtaryldy. QR «Bilim týraly» zańynyń 63-babyn buzǵan pedagog «sógis» túrindegi tártiptik jaýapkershilikke tartyldy», - delingen aqparatta.

Sondaı-aq departament qyzmetkerleri mektep ákimshiligine túsindirý jumystaryn júrgizgen.

«Mektep basshylyǵy aqsha jınaý bir synyptyń ata-anasynyń bastamasy ekendigin alǵa tartty. Olarǵa oqýshylar men muǵalimderden aqsha jınaýǵa zań boıynsha tyıym salynǵany taǵy bir márte eskertildi. Al sybaılas jemqorlyqqa qarsy qyzmetke habarlasqan áıel máseleniń jedel sheshilgenine rızashylyǵyn bildirdi», - delingen habarlamada.