Óskemende Kúrshim aýdanynyń aýyl sharýashylyǵy jármeńkesi ótti

ÓSKEMEN. QazAqparat – Óskemen qalasynda Kúrshim aýdanynyń aýyl sharýashylyǵy jármeńkesi ótti, dep habarlaıdy QazAqparat tilshisi.

Búgin Óskemendegi «Freshmarket» gastronomynda Kúrshim aýdanynan kelgen sharýalardyń uıymdastyrýymen aýyl sharýashylyǵy jármeńkesi ótti. Onda aýdan kásipkerleri qala turǵyndaryna óz ónimderin usyndy. Jármeńkege oblys ákimi Danıal Ahmetov keldi.

«Jármeńkede Kúrshim aýdanyndaǵy sharýa qojalyq ıeleri óz ónimderin naryqtaǵydan birshama tómen baǵada usyndy. Óskemendikter et, balyq, kókónister, jemister men ulttyq taǵamdarymyzdy satyp aldy. Merekelik baǵdarlama da daıyndalǵan. Dástúrli jármeńkelerdi ótkizip otyrýdyń tıimdiligi zor. Aýyldyń taza ónimderi oblys ortalyǵynyń turǵyndary arasynda suranysqa ıe», - dedi aımaq basshysy.

Kúrshim aýdandyq kásipkerlik jáne aýyl sharýashylyǵy bóliminiń málimetinshe, jármeńkege 12 aýyldyq okrýgten úsh tonnaǵa jýyq sıyr eti, eki tonnaǵa jýyq jylqy eti, 850 keli qoı eti, eki tonna balyq jáne balyq ónimderi ákelingen. Sıyr eti men qoı eti 2 100 teńgeden, jylqy eti 2 300 teńgeden, baldyń kelisi 1 700 teńgeden satyldy. Salystyrmaly túrde aıtsaq, Óskemendegi bazarlarda sıyr men qoı etiniń baǵasy osydan áldeqaıda joǵary.