Óskemende kún saıyn kúıeýinen jábir kórgen 10-ǵa jýyq áıel polıtsııadan kómek suraıdy
Búgin Halyqaralyq otbasy kúnine oraı qaladaǵy O.Bókeı atyndaǵy kitaphanada jıyn ótti. Onda Óskemen qalalyq Polıtsııa basqarmasy jergilikti polıtsııa bóliminiń áıelderdi zorlyq-zombylyqtan qorǵaý ınspektory, polıtsııa maıory Nurgúl Saıajanova áıel adamdarǵa quqyqtaryn túsindirse, psıholog Nazıgúl Abylqasqyzy psıhologııalyq turǵyda keńes berdi.
«Kún saıyn Óskemende kúıeýinen jábir kórgen 10-ǵa jýyq áıel polıtsııadan kómek suraıdy. Jyl basynan beri otbasylyq-turmystyq zorlyq-zombylyq boıynsha 1560 aryz tirkelgen. 1424 adamǵa qorǵaý nusqamasy berilip, sot úkimimen 169 azamatqa erekshe talaptar qoıyldy. Turmystyq zorlyq-zombylyqqa tap bolǵan áıel birden polıtsııaǵa habarlasýy qajet. Buryn zań boıynsha áıeline, balasyna jeńil dárejedegi dene jaraqatyn keltirgen er adam 15 AEK mólsherinde aıyppul tólese nemese 15 kúnge qamaýǵa alynsa, endi engizilgen ózgeristerge sáıkes, 200 AEK aıyppul tólep, 200 saǵattyq qoǵamdyq jumysqa tartylyp nemese 50 kúnge qamalady. Al qatigezdikpen uryp-soqsa 2 jylǵa bas bostandyǵynan aıyrylady», - deıdi Nurgúl Saıajanova.
Qazir tártip saqshylaryna otbasynyń shyrqyn buzǵandarǵa qatysty is qozǵaý úshin áıelinen aryz alý shart emes. Osyndaı zańsyz áreketke kóbinese turmysy nashar, jumysy joq, buryn sottalǵan er adamdar baryp jatady.
«Otbasyndaǵy baqyttyń qupııasy – erli-zaıyptylardyń bir-birimen sóılese bilýinde, túsinistiginde. Ózińizdiń jáne qasyńyzdaǵy azamattyń tulǵa ekenin umytpaı, ony syılańyz. Buzyq, tóbeleskish balalar qaıdan shyǵady? Úıde syılastyq kórmegen, jumysbasty ata-anasy oǵan kóńil bólmegen balalar sondaıǵa barady. Mekteptegi býllıng osydan týyndaıdy. Keıbir otbasynda qyzǵa múlde sóz bermeıdi, ursady, durys kıim alyp bermeıdi. Ákesi araq ishse tipti tamaq ta jemeı, ash júredi. Sondaıdy kórgen qyz turmysqa shyqqan soń kúıeýiniń zábirine kóndigip ketedi. Bul múlde durys emes. Sondyqtan ul-qyzdaryńyzdyń tárbıesine kóńil bólińizder», - deıdi Nazıgúl Abylqasqyzy.