Óskemende qoımada shyqqan órt sóndirildi

ÓSKEMEN. QazAqparat – Óskemen qalasyndaǵy qoımada shyqqan qyzyl jalynmen 40-qa jýyq órt sóndirýshi kúresti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 18 aqpanda tańǵy saǵat 06.00 shamasynda Óskemendegi kásiporyndardyń birinde qoımanyń janyp jatqany týraly habar tústi. Oqıǵa ornyna órt sóndirýshiler dereý kelip jetti.

«Ashyq jalynǵa oranǵan qoıma ishindegi 2 júk kóligi men 1 jeńil avtokólik te órtengen. Jyldam taraǵan qyzyl jalynnyń jalpy aýdany 200 sharshy metrge jetti. Tilsiz jaýdy aýyzdyqtaýǵa jeke quramnan 38 adam jáne 11 tehnıka jumyldyrylǵan», - delingen aqparatta.

Eki saǵattan astam ýaqyt ishinde órt tolyqtaı aýyzdyqtaldy. Ottyń shyǵýyna – elektr jabdyqtaryn montajdaý jáne paıdalaný kezinde qaýipsizdik talaptarynyń saqtalmaýy sebep bolýy múmkin.