Óskemende kóshelerdiń ataýyn ózgertý úshin jumys toby quryldy

ASTANA. QazAqparat - Óskemende kóshelerdiń ataýyn ózgertýdi qolǵa alǵaly otyrǵan onomastıka boıynsha jumys toby quryldy. Onyń quramyna ǵalymdar, memlekettik qyzmetkerler men qala turǵyndary enip otyr, dep habarlaıdy «QazAqparat» HAA tilshisi.

Bul týraly Óskemen qalasy ákiminiń baspasóz hatshysy Ásem Seksenova habarlady.

«QR Mádenıet jáne sport mınıstrliginiń tarıhı turǵyda eskirgen kóshelerdiń ataýyn ózgertý týraly keńesine sáıkes, qala turǵyndarynan túsip jatqan usynystar qaralý ústinde. Biraq, qazirgi ýaqytta tek protsestiń talqylaý kezeńi men qujattardy zertteý jumysy ǵana ótip jatyr», - deıdi Ásem Seksenova.

Al qalalyq mádenıet jáne tilderdi damytý bóliminde bul protsestiń barlyǵy ashyq túrde ótetinin málim etti.

«Barlyq usynystar qalalyq máslıhatqa túsip, bir aı buryn BAQ-ta jarııalanatyn bolady. Eshqandaı shýdyń keregi joq. Barlyǵy ashyq túrde ótip, kóshelerdiń ataýyn ózgertý týraly usynys qala turǵyndarymen birge talqylanatyn bolady», - deıdi qalalyq mádenıet bólimi basshysynyń orynbasary Baqytjan Saǵynqyzy.

Al buǵan deıin birshama dúrbeleń týǵyzǵan «Kolhoznaıa» kóshesin «Aqsý» dep ózgertý týraly sheshimdi jumys toby qoldamaǵan.