Óskemende kópqabatty úıden órt shyǵyp, 30 adam evakýatsııalandy

ÓSKEMEN. QazAqparat – Óskemen qalasynda kópqabatty úıden órt shyǵyp, 30 adam evakýatsııalandy, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, 101 qyzmetine Potanın kóshesindegi kópqabatty úıde órt shyqqany týraly habar tústi. Oqıǵa ornyna shuǵyl jetken qutqarýshylar tútin basqan podezden 30 adamdy, onyń ishinde 2 balany evakýatsııalady.

«Belgili bolǵandaı, páterlerdiń birindegi balkonda qoqys janǵan. Kóp uzamaı jalpy aýdany 3 sharshy metrdi quraǵan tilsiz jaý tolyqtaı aýyzdyqtaldy. Órttiń shyǵý sebebi anyqtalýda», - dep habarlady vedomstvo ókilderi.

Otpen kúreske barlyǵy jeke quramnan 24 adam men 7 tehnıka jumyldyryldy. Zardap shekken eshkim joq.