Óskemende kópqabatty úıde órt shyǵyp, 20 adam evakýatsııalandy

ÓSKEMEN. QazAqparat – Óskemen qalasynda kópqabatty úıde órt shyǵyp, 20 adam, onyń ishinde 8 bala evakýatsııalandy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Sátbaev dańǵylyndaǵy kópqabatty turǵyn úıdiń ekinshi qabatyndaǵy páterde órt shyqqan. Oqıǵa ornyna órt sóndirýshiler shuǵyl jetti.

«Páterdegi jıhaz, jeke zattar jáne esik janǵan. Úı ıesiniń uly óz betimen syrtqa shyǵyp úlgerdi. Qutqarýshylar podezden birinshi kezekte 20 adamdy, onyń ishinde 8 balany evakýatsııalady. Kóp uzamaı jalpy aýdany 10 sharshy metrdi quraǵan tilsiz jaý tolyqtaı aýyzdyqtaldy», - delingen aqparatta.

Órttiń shyǵý sebebi – elektr jabdyqtaryn montajdaý jáne paıdalaný kezinde qaýipsizdik talaptaryn saqtamaýdan bolýy múmkin. Qyzyl jalyndy sóndirýge jeke quramnan 21 adam jáne 7 tehnıka jumyldyryldy.