Óskemende kópirden sekirip ólmek bolǵan 23 jastaǵy jigit qutqaryldy

ÓSKEMEN. QazAqparat – Óskemen qalasynda kópirden sekirmek bolǵan 23 jastaǵy jigit qutqaryldy, dep habarlaıdy QazAqparat tilshisi.

Qalalyq polıtsııa basqarmasy baspasóz qyzmetiniń málimetine súıensek, «102» jedel arnasyna habarlasqan azamat Úlbi kópirinde beıtanys bireýdiń sýǵa sekirmekshi bolyp turǵanyn jetkizdi.

Shuǵyl túrde sol jerge polıtsııa qyzmetkerleri jolǵa shyqty.

«Tártip saqshylary Rýslan Rashıdov pen Dosym Keńesbaev kópirden sýǵa sekirýge oqtalǵan jas jigitti kóredi. R. Rashıdov jigitti sózge tartyp, toqtatýǵa tyrysady. Al osy kezde D.Keńesbaev er adamnyń tý syrtynan bildirtpeı baryp, ony qapsyra qushaqtap ustap alady. Polıtseıler jigitti eki jaqtap qaýipsiz jerge ákeledi», - delingen aqparatta.

Polıtsııa qyzmetkerleri medıtsınalyq kómek kórsetý úshin jedel járdemge habarlasqan.

Aq halattylar 23 jastaǵy jigitti tekserip, onyń ómirine eshqandaı qaýip joqtyǵyna kóz jetkizdi.

Ary qaraı mán-jaıdy anyqtaý úshin er adam Óskemen qalalyq polıtsııa basqarmasyna jetkizildi.