Óskemende kómir jaǵyp otyrǵan jer úıler ortalyqtandyrylǵan jylýǵa kóshirilmek

<p>ÓSKEMEN. KAZINFORM &ndash; Óskemen qalasyndaǵy ekologııa jaǵdaıyn jaqsartý úshin jer úılerdi ortalyqtandyrylǵan jylý júıesine kóshirý josparlanyp otyr.</p>

Qalada jel soqpaǵanda aınalany tútin basyp ketetindiginiń birneshe sebebi bar. Sonyń biri - pesh jaǵyp otyrǵan úılerdiń zııandy shyǵaryndylarynyń aýaǵa taraýy. 

Buny taıaýda qolaısyz meteorologııalyq jaǵdaı jarııalanǵan kezde jeke sektorǵa júrgizilgen tekserý jumystary dáleldedi. Mırnyı kentinde ekologtar kúkirt dıoksıdiniń, kómirtegi totyǵy men hlordyń ruqsat etilgen shekten asyp ketkenin anyqtaǵan.

Al Zaşıta shaǵyn aýdanynda kúkirtti sýtegi men hlordyń aýaǵa taraǵan normasy shamadan tys bolǵan. 

- Qaladaǵy ónerkásiptik kásiporyndardyń zııandy shyǵaryndylary jylyna shamamen 55 myń tonnany quraıdy. Onyń 10 paıyzy - avtonomdy qazandyqtardan. Jeke turǵyn úıler jylytý maýsymynda shamamen 240 myń tonna kómir jaǵady. Bul 14 myń tonna zııandy shyǵaryndy, - dep habarlady ShQO ekologııa departamentinen. 

Osy máselege qatysty oblys ákimi Ermek Kósherbaev Ortalyq kommýnıkatsııalar qyzmetiniń baspasóz konferentsııasynda jaýap berdi. 

- Kómirdi jaqqanda aýaǵa taraıtyn shyǵaryndy tumanmen jáne basqa da shyǵaryndylarmen aralasyp, aýany odan saıyn lastaıdy. Óskemende pesh jaǵyp otyrǵan 28 myń úı bar. Bálkim, másele kómirdiń sapasynda shyǵar. Biraq bul jerde turǵyndardyń kinási joq. Biz jeke sektordy ortalyqtandyrylǵan jylý júıesine qosý jaǵyn da oılastyryp jatyrmyz», - dedi ol. 

Eske salsaq, osyǵan deıin Óskemen qalasyndaǵy ekologııa máselesin sheshý úshin arnaıy bıýro qurylyp, baqylaýdy kúsheıtý kózdelip otyrǵany habarlanǵan.