Óskemende kommýnaldyq tólemdi keshiktirgenderge nesıe berilmeıdi

ÓSKEMEN. QazAqparat - Óskemendikter páter ıeleri kooperatıvterine 252,4 mln teńge bereshek. Qala ákimdigi tólemnen jaltaryp júrgen turǵyndardyń nesıe alý quqyǵyn shektemekshi, dep habarlaıdy QazAqparat tilshisi.

Turǵyn úı qatynastary bóliminiń basshysy Farhat Jilibaevtyń aıtýynsha, páter ıeleri kooperatıvi turǵyndardan 252 397 163 teńge kólemindegi qyzmet aqysyn qaıtara almaı otyr.  Bul máselege ákimdik aralasyp, qaryzdy qaıtartý úshin ákimshilik tetikterdi qospaqshy.

«Elden jınalǵan aqsha úılerdi kútip ustaýǵa jumsalady. Tólem tolyq túspegen soń ol jumystar tolyq atqarylmaı otyr. Páter ıeleri kooperatıvteriniń qaýymdastyǵy men «Bastapqy nesıe bıýrosy» JShS arasynda memorandým qabyldandy. Sol memorandým boıynsha qaryzy bar turǵyndar ony tolyq ótegenshe eshqandaı nesıe rásimdeı almaıtyn bolady. Áıtpese, boryshkerler zańǵa baǵynatyn kórshileriniń esebinen úıge kórsetiletin qyzmetti aqysyz paıdalanýyn toqtatar emes» - deıdi Farhat Jilibaev.

Kommýnaldyq qyzmet úshin qaryzy bar turǵyndar moınyndaǵy bereshektiń naqty mólsherin bilý úshin kdmyk.kz saıtyna kirýi qajet. Boryshkerler týraly tolyq aqparat atalmysh portalda 5 maýsymnan keıin shyǵady.