Óskemende qazaqtan shyqqan tuńǵysh áskerı ushqyshqa eskertkish ornatylady
Qala ákiminiń baspasóz hatshysy Álibek Túrsimbetovtiń aıtýynsha, batyr eskertkishin ornatý jumystary bıyl jazda qolǵa alynbaq. Óskemenniń irgesindegi Ablaket yqsham aýdanynda ushqyshtyń atynda úlken kóshe bar. Eskertkish sol kósheniń basyna, úlken jartastyń ústindegi kórneki orynǵa qoıylmaq. Atalmysh kósheniń boıyna buǵan deıin urpaqtary syntas ornatqan bolatyn. Ol eskertkish jyldar boıy vandaldardyń shabýylyna ushyrap, birneshe ret jóndeý kórgen. Qala ákimi Jaqsylyq Omar atalmysh máseleni birjaqty sheshý úshin «Altaıdan ushqan aqıyqqa» arnap jańa eskertkish ornatý týraly tapsyrma bergen.
«Eskertkishtiń alǵashqy eskızi daıyn. Qalalyq TÚKSh, jolaýshylar kóligi jáne avtomobıl joldary bóliminiń mamandary onyń mańaıyn abattandyrý boıynsha joba daıyndap jatyr. Mańaıynda kólik toqtap, taǵzym etetindeı alańqaı tóseledi. Aldaǵy qalalyq máslıhat sessııasynda bıýdjetke tapsyrys beriledi» - deıdi Álibek Túrsimbetov.
Qazirgi tańda shahardaǵy 26 kóshemen birge J. Maldybaev atyndaǵy kóshede de jóndeý jumystary júrip jatyr.