Óskemende Qazaqstan-Germanııa ǵylym jáne tehnologııa ınstıtýty ashylady
QR Prezıdenti Qasym-Jomart Toqaev pen Germanııa Prezıdenti Frank-Valter Shtaınmaıerdiń qatysýymen ótken Qazaqstan-Nemis ýnıversıtetteri rektorlarynyń forýmy aıasynda D. Serikbaev atyndaǵy Shyǵys Qazaqstan tehnıkalyq ýnıversıteti jáne Qazaqstan-Germanııa ýnıversıteti metallýrgııa jáne taý-ken isi salasynda ǵylym jáne tehnologııa ınstıtýtyn ashý týraly negizdemelik kelisimge qol qoıdy.
Kelisim boıynsha Metallýrgııa jáne paıdaly qazbalardy óndirý salasyndaǵy ǵylym jáne tehnologııalar ınstıtýty qurylyp, ınjenerııa salasyndaǵy úzdik nemis tájirıbesi elimizde qolǵa alynady. Joba maqsaty – elimizdiń Shyǵys óńirin órkendetý, ál-aýqatyn jáne ornyqty damýyn júzege asyrý úshin zertteýler, bilim jáne ınnovatsııa «bilim úshtigine» negizdelgen platforma qurý.
«Ǵylym jáne joǵary bilim salasyndaǵy saıasat bilim men ǵylymdy ınternatsıonaldandyrýdy keńeıtýge, turaqty jáne tıimdi baılanystardy qalyptastyrýǵa baǵyttalǵan. Yntymaqtastyq negizi úsh túrli baǵytta júrgiziledi. Birinshisi, bilim berý. Bul metallýrgııa, mashına jasaý, geologııa jáne taý-ken isi, paıdaly qazbalardy baıytý, turaqty damý baǵyttary boıynsha eki dıplomdy jáne birlesken kadrlar daıarlaý. Ekinshi baǵyt - metallýrgııa jáne materıaltaný, geodezııa, geologııa jáne taý-ken isi, turaqty damý salasyndaǵy birlesken zertteýler. Úshinshi baǵyt – ınnovatsııalar, ǵylym men óndiristiń ınnovatsııalyq klasterin, birlesken ǵylymı jáne startap jobalardy iske qosý», - dedi D. Serikbaev atyndaǵy ShQTÝ Basqarma tóraǵasy-rektor Sáýle Rahmetýllına.
Metallýrgııa jáne paıdaly qazbalardy óndirý salasyndaǵy ınstıtýttyń qurylýy el ǵylymyn jáne tehnologııalaryn damytýdaǵy, sondaı-aq eki el arasyndaǵy dostyq qatynastardy nyǵaıtýdaǵy mańyzdy qadam bolyp otyr.