Óskemende qatty jelden kópqabatty úıdiń qasbeti opyrylyp tústi

ÓSKEMEN. QazAqparat – Óskemen qalasynda qatty jelden kópqabatty úıdiń qasbeti opyrylyp tústi, dep habarlaıdy QazAqparat tilshisi.

Kesheli beri Óskemende qatty jel soǵyp tur.

Onyń saldarynan Jibek matalar kombınaty yqsham aýdanyndaǵy Esenberlın kóshesinde ornalasqan kópqabatty úıdiń qasbeti opyrylyp tústi.

Odan bólek, aǵashtar qulap, kólikterge zaqym kelýde. Kommýnıkatsııa jelileri úzilip, aıaldama pavılondary da buzylýda.

«Taza Óskemen» kommýnaldyq memlekettik kásiporynnyń málimetine súıensek, qazir qala boıynsha qalypqa keltirý jumystary júrgizilip jatyr.

«Mamandar qulaǵan aǵashtardy alyp, aıaldamalardy jóndeý ústinde. Qazirgi ýaqytta Ál-Farabı dańǵylyndaǵy jelmen ushyp túsken aıaldama pavılony bólshektelip, alynyp tastaldy. Osy rette, turǵyndarǵa kóshede barynsha abaı bolýǵa shaqyramyz. Júrgizýshiler kólikterin aǵashtardyń qasyna qoımaǵan durys», - delingen aqparatta.