Óskemende kásipker ákimdikpen sottasyp, jeńip shyqty

<p>ÓSKEMEN. KAZINFORM &ndash; Óskemen qalasynda kásipker ákimdikti sotta jeńip shyqty.</p>

Kásipkerge tıesili nysannyń kireberisi memlekettiń balansyndaǵy jerde ornalasqandyqtan ákimdik ony buzýdy talap etken. Buǵan deıin kásip ıesine osy jerdi jalǵa alýǵa ruqsat berilmegen. Bul talappen kelispegen kásipker ShQO Kásipkerler palatasyna júgindi.

- Óskemen qalasynyń ákimdigi kásipkerlikti qoldaý men damytýǵa kómektesýdiń ornyna kireberisti buzýdy talap etip, sotqa shaǵym túsirgen. Kásipker ortaq mámilege kelýge tyrysyp, jerdi jalǵa berýdi surady. Biraq odan bas tartyldy. Biz kásip ıesine jan-jaqty quqyqtyq qoldaý kórsettik, - deıdi Kásipkerler palatasy dırektorynyń orynbasary Álııa Muqasheva.

Sonyń nátıjesinde Shyǵys Qazaqstan oblysynyń mamandandyrylǵan aýdanaralyq ákimshilik soty ákimdiktiń jeke kásipkerge memleket menshigindegi jerge ǵımaratqa kireberisti ornalastyrý úshin jer telimin berýden bas tartýyn zańsyz dep tanydy. Osylaısha, kásipker sotta jeńip shyqty.

Aıta keteıik, 2024 jyly ShQO Kásipkerler palatasynda kásip ıeleriniń quqyǵyn qorǵaý máseleleri boıynsha 300-den astam ótinish qaraldy. Olardyń basym bóligi kásipkerlerdiń paıdasyna sheshildi. Aryz-shaǵymdar negizinen jer men salyq máselelerine qatysty bolǵan.

Eske salsaq, osyǵan deıin Oralda kásipker áıeldiń jaýapkershilikke negizsiz tartylǵany anyqtalǵany habarlanǵan.