Óskemende qarttar úıinde tanysqan eki zeınetkerdiń nekesi qıyldy

<p>ÓSKEMEN. KAZINFORM — Óskemen qalasynda otbasy kúni qarsańynda qarttar úıinde eki zeınetkerdiń nekesi qıyldy.</p>

Lıýdmıla Nıkolaevnanyń jasy 71-de. Ol qarttar úıinde joldasyn keziktiretindigin esh sezbegen. 

«Qarttar úıine túskenime biraz jyl boldy. Mine, ózimniń jan jarymdy taptym. Qazir tipti keıde aıaǵymnyń aýyratyndyǵyn umytyp ketemin. 64 jastaǵy kúıeýim meni syılaıdy, jaqsy kóredi. Osylaı naǵyz otbasylyq baqytqa ıe bolyp otyrmyz», — deıdi zeınetker.

Foto: Azamattarǵa arnalǵan úkimet ShQO fılıalynan

Ekeýi 2 aı boıy sóılesip júrgen. Qalybek Kateev úılenýge usynys jasap, Lıýdmıla Nıkolaevna óz kelisimin bergen. 

«Nekemizdi tirkedik. Endi qarttar úıinde birge turamyz. Tipti bizge bólek bólme berildi. AHAT qyzmetkerlerine osynda kelip, nekemizdi tirkegeni úshin kóp rahmet!», — deıdi erli-zaıyptylar.

ShQO AHAT basqarmasynyń basshysy Álııa Qyryqpaevanyń aıtýynsha, otbasy kúninde shańyraq kótergisi keletin shyǵysqazaqstandyqtar kóp.