Óskemende qalanyń burysh-buryshyna esirtki qoıyp ketetin 11 adam ustaldy
Óskemende esirtki qylmysyna qarsy is-qımyl sharalary kúsheıtildi.
Bul úshin Shyǵys Qazaqstan oblysynyń polıtseıleri oblys prokýratýrasymen ózara is-qımylda jáne QR ІІM arnaıy bólimsheleriniń qatysýymen qolda bar barlyq quraldar men arnaıy múmkindikterdi paıdalana otyryp, esirtki zattarynyń zańsyz aınalymynyń jolyn kesýge baǵyttalǵan arnaıy is-sharalar keshenin ótkizdi.
Áleýmettik jeliler men ınternetke júrgizilgen monıtorıng nátıjesinde sıntetıkalyq zattardyń taralýyna qatysy bar saıttar anyqtaldy.
Óskemen qalasynda qalyptasqan jaǵdaıdy taldaý jáne qadaǵalaý arqyly quqyq qorǵaý organdary sıntetıkalyq esirtki salatyn 10-nan astam adamnan turatyn topty anyqtady.
ShQO PD bastyǵynyń orynbasary polıtsııa polkovnıgi Talǵat Shaıahmetov atap ótkendeı, qajetti dálelder bazasyn jınaýǵa jáne kúdiktilerdi ustaýǵa birneshe apta qajet bolǵan.
Osy ýaqyt ishinde jedel ýákilder táýlik boıy demalyssyz jumys istedi.
Olar qylmystyq áreketi baıqalmaı qalady dep senip, qastandyq sharalaryn muqııat oryndady, ol úshin kıimderin únemi aýystyryp otyrdy jáne keı jaǵdaılarda jasandy shash (parık) qoldandy.
Ustalǵandar týraly aqparat qylmystyq tizbektiń basqa qatysýshylaryna jetpeýi úshin kúdiktilerdiń árqaısysy bólek ustaldy.
Olardan sıntetıkalyq esirtkiniń 220-dan astam bir rettik dozasy jáne «ekstazı» dep atalatyn 80 tabletka tárkilendi.
Búginde atalǵan adamdardyń bári derlik sottyń sanktsııasymen qamaýǵa alyndy.
Olardyń áreketi QR QK 297-babynyń 3-bóligi boıynsha saralanady.
Osy baptyń sanktsııasynda 10 jyldan 15 jylǵa deıingi merzimge bas bostandyǵynan aıyrý jazasy kózdelgen.