Óskemende ınvestıtsııalyq forým ótedi
Qaladaǵy kásipkerlikti damytýǵa baǵyttalǵan sharany 30 qazan kúni ótkizý josparlanǵan. Forýmǵa respýblıka kólemindegi kásipkerler shaqyryldy. Jıyn úsh sektsııa boıynsha júredi:
1. «Aýylsharýashylyq jáne kommertsııalyq baǵyttaǵy jer telimderi»
2. «Memlekettik-jekemenshik seriktestik jobalary men senimdi basqarý»
3. «Qaladaǵy ındýstrıaldyq aımaqtardy damytý»
Óskemen qalalyq ekonomıka jáne bıýdjettik josparlaý bóliminiń málimetinshe, qazirgi ýaqytta forýmǵa qatysýǵa 30 ótinish kelip túsken.
– El kóleminde jalpy sany 200 shaqyrý tarattyq. Ázirshe 30 kásipkerden naqty ótinishi tústi. Olardyń deni oblystaǵy bıznes ókilderi, – deıdi qalalyq ekonomıka jáne bıýdjettik josparlaý bóliminiń basshysy Arman Muqtarqanuly.
Sharany uıymdastyrýshy taraptyń aıtýynsha, kásipkerlerden ótinish qabyldaý jalǵasa beredi.
– Negizinen osy ýaqytqa deıin forým týraly habardy aımaqtyń túkpir-túkpirine taratýǵa kúsh saldyq. Aldaǵy apta ishinde respýblıkaǵa jarnamalaýdy qolǵa alamyz. Ótinishter sany kóbeıetinine senimdimin, – deıdi qala ákimdiginiń baspasóz hatshysy Álibek Tursynbet.