Óskemende esirtki zerthanasy joıyldy

NUR-SULTAN. QazAqparat – Jambyl oblysynda esirtki taratqan kúdiktiler quryqtaldy. Bul týraly QR Іshki ister mınıstrliginiń ókili Shuǵyla Turlybek vedomstvonyń onlaın brıfıngisinde aıtty, dep habarlaıdy QazAqparat tilshisi.

«Jambyl oblysy Polıtsııa departamenti esirtki qylmysyna qarsy is-qımyl basqarmasynyń qyzmetkerleri esirtki taratqan eki jergilikti turǵyndy ustady. Tintý kezinde kúdiktilerden taratýǵa daıyndalǵan, 15 paketke salynǵan sıntetıkalyq mefedron esirtkisi tárkilendi. Olardyń áleýmettik jelilerdegi hat-habarlaryn zertteý barysynda kúdiktilerdiń esirtkilerdi jasyryn oryndarǵa qoıǵandary belgili boldy», - dedi Sh. Turlybek.

Onyń aıtýynsha, kúdiktilerdiń hat almasýynda kórsetilgen oryndar boıynsha polıtsııa qyzmetkerleri Tarazda jáne qala mańynda jasyrylǵan esirtkilerdi alty saǵat ishinde joıdy. Tekseris barysynda mefedron jasyrylǵan 29 oryn anyqtaldy.

Ustalǵandar óz kinálaryn moıyndady jáne Taraz qalasynyń ýaqytsha ustaý ızolıatoryna qamaýǵa alyndy.

Sonymen qatar, Óskemende beınebaqylaý júıeleriniń kómegimen esirtki satýshy ustalyp, jasyryn zerthana joıyldy. Baqylaý barysynda jas jigittiń kún saıyn páterden keshke qaraı rıýkzaktarmen shyǵyp, aýdandy aınalyp ótip, túnde úıge oralatyny anyqtaldy. Osylaısha onyń esirtki jasyrýmen aınalysatyny belgili boldy. Ustaý kezinde kúdiktiden «alfa-pvp» sıntetıkalyq esirtkisi tárkilendi.

«Jaýap alý barysynda kúdiktiniń buryn Qaraǵandyda turǵany, al Óskemenge aqsha tabý maqsatynda esirtki óndirý jáne ótkizý úshin kelgeni belgili boldy. Jaldamaly úıdi tintý barysynda polıtseıler satýǵa daıyndalǵan taǵy 600 gramm sıntetıkalyq esirtki tárkiledi», - dedi Sh. Turlybek.