Óskemende esirtki tasymaldaǵan jigitten 250 doza tárkilendi

ÓSKEMEN. QazAqparat – Óskemen qalasynda esirtki tasymalymen aınalysqan 21 jastaǵy jigit ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, Esirtki qylmysyna qarsy kúres basqarmasynyń qyzmetkerleri «Qarasora-2021» respýblıkalyq jedel-aldyn alý sharasy barysynda Óskemende psıhotroptyq zattardy tasymaldaǵan jigitti ustady.

«Ońaı jolmen paıda tabý maqsatynda 21 jastaǵy er adam zańsyz jolǵa bet burǵan. Tártip saqshylary jeke tintý júrgizý kezinde odan ızolentamen oralǵan sıntetıkalyq esirtkiniń 250 dozasyn tapty. Ustalǵan qala turǵyny úı qamaǵyna alyndy», - dedi oblystyq PD bastyǵynyń orynbasary Talǵat Shaıahmetov.

Qazirgi ýaqytta atalǵan fakti boıynsha QR QK-niń 297-baby 3-bóligine sáıkes sotqa deıingi tergeý amaldary bastaldy. Kúdikti 15 jylǵa deıin bas bostandyǵynan aıyrylýy múmkin.