Óskemende esirtki saýdasymen aınalysqan elorda turǵyny ustaldy
ShQO polıtsııa departamenti baspasóz qyzmetiniń málimetine súıensek, tártip saqshylary esirtki oraýshy-kýrerdi ustady.
«Óskemende Esirtki qylmysyna qarsy is-qımyl basqarmasynyń jedel ýákilderi oblys prokýratýrasymen birlesip jedel-izdestirý is-sharalaryn júrgizý barysynda tyıym salynǵan zattardy baılanyssyz tásil arqyly taratqan 26 jastaǵy elorda turǵynyn qolǵa túsirdi. Ol esirtkini tanymal messendjerlerdiń birinde ınternet-dúken arqyly satqan», - delingen aqparatta.
Polıtseıler er adamnyń aımaqtyq kýrer jáne esirtki qoımasynyń oraýshysy qyzmetin atqarǵanyn anyqtady.
Kúdikti asa iri kólemdegi esirtki zattaryn alyp, olardy orap, jasyryn jerlerge qoıyp otyrǵan.
«Tintý júrgizý barysynda onyń jaldamaly páterinde jalpy salmaǵy 500 gramnan asatyn psıhotroptyq zattar tabyldy. Atalǵan fakti boıynsha QR QK-niń 297-baby 3-bóligi 1,3,5-tarmaqtarymen qylmystyq is qozǵaldy. Kúdikti 10-nan 15 jylǵa deıin bas bostandyǵynan aıyrylýy múmkin», - delingen habarlamada.