Óskemende esirtki qabyldap kólik tizgindegen zeınetker ustaldy

ÓSKEMEN. QazAqparat – Óskemen qalasynyń polıtseıleri esirtki qabyldap kólik tizginine otyrǵan zeınetkerdi ustady, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary Gagarın býlvary kóshesinde patrýldeý kezinde «Porsche Cayenne» markaly kólikti baıqaǵan. Júrgizýshi joldaǵy jolaqtan qarsy baǵytqa qaıta-qaıta shyǵyp, jyldamdyqty birese arttyryp birese tómendetken.

«Polıtseıler jol júrisi qaǵıdalaryn buzǵan kólik júrgizýshisin toqtatty. Sóılesý kezinde polıtsııa qyzmetkerleri odan aıqyn mas kúıdegi adamnyń belgilerin baıqaǵan. Medıtsınalyq kýálandyrý 66 jastaǵy azamattyń kannabınoıdtardy qoldanyp, esirtkilik masań kúıde bolǵanyn kórsetti», - delingen aqparatta.

Zeınetkerge qatysty QR ÁQBtK-niń 608-baby 1-bóligi boıynsha ákimshilik is qozǵaldy.

Ótken aptada polıtsııa qyzmetkerleri kólikti mas kúıde basqarǵan 40 júrgizýshini anyqtaǵan.

Eske salsaq, osyǵan deıin ShQO-da bıyl ınternet alaıaqtyqtyń 300-ge jýyq faktisi tirkelgenin habarlaǵan edik.