Óskemende Denıs Tendi eske alý sharasy dabyrasyz ótti
Borıs Aleksandrov atyndaǵy sport saraıynyń aldyna jurt keshki saǵat 20.30-dan bastap aǵyldy. Saǵat tili 21.00-di kórsetkende júzdegen óskemendik turǵyn sportshy sýretiniń aldyna shyraq tutatyp, eske alý rásimin jasady. Erikti jurtqa kósheden kezdeısoq ótip bara jatqandar da qosylyp jatty. Osynyń barlyǵyn qoǵamdyq qaýipsizdik pen órtke qarsy qyzmet, jedel járdem ókilderi qadaǵalap turdy. Jınalǵan jurttyń arasynda jastardyń qarasy basym ekeni kórer kózge aıqyn bilindi. Olardyń arasynda qala qonaqtary da da bar bolyp shyqty. «Jas Otan» jastar qanatynyń atqarýshy hatshysy Dáýlet Káribek Shyǵys Qazaqstanǵa resmı saparmen kelgen beti eken. Óskemende osyndaı shara ótetinin estip, irgedegi aýdannan arnaıy kelgenin aıtty.
«Denıs Tenmen 2015 jyly Respýblıkalyq Jastar forýmyn ótkizgen kezde tikeleı jumys istedik. Kóptegen tanymal jastarmen birge ol da Elbasy aldynda sóz sóılegeni esterińizde bolar. Sol sharaǵa daıyndyq kezinde Denıstiń adamgershiligine tamsanǵanbyz. Daıyndyqqa keshikpeı, eshkimdi áýrelemeı-aq kelip júrdi. Eńbegin, esimin buldaý degen múlde bolǵan joq. Moınyna alǵan mindetine asqan jaýapkershilikpen qaraıtynyn kórdik. Ózine jeke bólme surap alyp, aıtatyn sózin pysyqtap, daýsyn shyǵara sóılep, daıyndalatyn. Forým taıaǵan sátte sóz sóıleýi tıis qyzdardyń keıbiri qatty qobaljydy. Sol kezde Denıs Ten álgi qurdastaryna tátti bálishter ákep berip, kóńilderin aýlaǵan bolatyn. Dálizde kezdese qalsaq ta, bárimizge pozıtıv syılap, mańaıyn jigerlendirip júrdi. Sóıtken áıgili zamandasymyzdan shańqaı túste kóz jazyp qalǵanda, tóbemizden jaı túskendeı boldy. Ol barsha jastardyń jadynda jarqyn bolmysymen qalady» - dep eske aldy qala qonaǵy.
«Únemi jymıyp júretin, ishki mádenıeti asa joǵary Denıs Tendeı juldyzdyń zamandasy bolǵanymyzdy maqtan tutamyz. Barlyq shyǵysqazaqstandyq jastar atynan marqumnyń týǵan-týysqandaryna kóńil aıtqymyz keledi. Bul qaıǵy búkil elge ortaq» - deıdi jastar ókili Marjan Baqytqyzy.
Eske alý sharasy áli de jalǵasýda.