Óskemende beıimdeý ortalyǵynda bala zorlaý faktisi boıynsha tekserý júrip jatyr

ÓSKEMEN. QazAqparat – Óskemen qalasyndaǵy kámeletke tolmaǵandardy beıimdeý ortalyǵynda balaǵa qatysty jynystyq sıpattaǵy zorlyq faktisi boıynsha tekserý júrgizilip jatyr, dep habarlaıdy QazAqparat tilshisi.

Bul týraly ShQO bala quqyqtary jónindegi ýákil Aqsana Kalenova málim etti.

«Óskemendegi kámeletke tolmaǵandardy beıimdeý ortalyǵyndaǵy balalarǵa qatysty jynystyq sıpattaǵy zorlyq-zombylyq jasalǵany týraly aqparat aldym. Birden tıisti jumystar qolǵa alyndy. Qazirgi basty maqsat – zorlyqtyń bolǵanyn nemese bolmaǵanyn naqty anyqtaý. Balalarǵa qysym kórsetilýine jol bermes úshin qala ákimdiginiń kómegimen olardy «Úlbi» áleýmettik ortalyǵyna jetkizdik», - deıdi ol.

Aqsana Kalenovanyń aıtýynsha, osyǵan baılanysty arnaıy jumys toby qurylyp, onyń quramyna bilim, densaýlyq saqtaý salalarynyń, quqyq qorǵaý organynyń ókilderi jáne qoǵam belsendileri kirdi.

Balalarmen jumys isteýde tájirıbesi bar kásibı psıhologtar da tartylǵan.