Óskemende belsendiler jol jóndeý jumystarynyń sapasyn baqylaıdy
Qala ákimdiginiń málimetine súıensek, bıyl jol jóndeý jumystarynyń sapasyna jurtshylyq tarapynan baqylaý ornatý týraly sheshim qabyldanǵan.
«Belsendilerge, ıaǵnı baqylaý toptarynyń qatysýshylaryna jumys júrip jatqan oryndar únemi qoljetimdi bolady. Sondaı-aq olar barlyq jaýapty tulǵalarmen baılanysta bola alady. Bastapqy kezeńde ár ýchaskeni turǵyndar men merdigerler birge aralap shyǵady», - deıdi shahar basshysy Jaqsylyq Omar.
Onyń aıtýynsha, erekshe nazar aýdarýdy qajet etetin tustar anyqtalýy tıis. Birinshi kezekte bul - sý jınalyp qalatyn oryndar men trotýarlardyń jaı-kúıi.
«Jóndeý kezinde jıektastardy demontajdaý paıdasyz ári tıimsiz degen pikirdi jıi estımiz. Sondyqtan biz bul máseleni barynsha ashyq etýdi sheshtik. Ár ýchaskedegi jıektastardyń jaramsyzdyǵyn anyqtaýǵa baqylaý toptary qatysady. Osy jumystardyń qorytyndysy boıynsha jıektastardyń 50-60 paıyzyna demontaj jasalatyn boldy. Baqylaý toptaryna kez kelgen nıet bildirgen turǵyn qosyla alatynyn eske salamyz. Ol úshin aýmaqtyq basqarý ortalyǵyndaǵy fılıalǵa barý kerek», - deıdi ákim.