Óskemende balalar úıinen 63 mln teńge jymqyrǵan dırektor men esepshi sottaldy

ÓSKEMEN. QazAqparat – Óskemen qalasynda balalar úıinen 63 mln teńge jymqyrǵan burynǵy dırektor, bas esepshi men kadr jumysy bóliminiń ınspektory sottaldy, dep habarlaıdy QazAqparat tilshisi.

Qalalyq №2 soty baspasóz qyzmetiniń málimetine súıensek, 25 aqpanda asa iri mólsherde bıýdjet qarajatyn jymqyrǵan balalar úıiniń burynǵy dırektory, bas esepshi men kadr jumysy bóliminiń ınspektoryna qatysty sot úkimi shyqty.

«Belgili bolǵandaı, olar aldyn ala sóz baılasyp 2015 jyldyń naýryzy men 2019 jyldyń qańtary aralyǵynda balalardyń qajettiligine bólingen 63 150 581 teńgeni jalǵan qujat jasaý arqyly qaltaǵa basqan. 2019 jyly bas esepshi áleýmettik jelige vıdeo jarııalap, óz isine ókinish bildirip, qarjy jymqyrý shemasyn áshkerelegen edi. Alaıda dırektor men kadr jumysy bóliminiń ınspektory kinásin moıyndamady», - delingen aqparatta.

Sot úkimi boıynsha úsh aıyptalýshy da ómir boıy memlekettik qyzmette jumys isteý quqyǵynan aıyrylyp, 7 jyl merzimge túrmege qamaldy.

Úkim áli zańdy kúshine engen joq.